'ராஜிவ் கொலையை வைத்து தமிழ் உணர்வுகளை அழிப்பதா

நவம்பர் 19, 2008

சென்னை:
ராஜிவ் காந்தி கொலையை வைத்து தமிழ் உணர்வுகளை அழித்து விட முடியாது என தி.க. தலைவர் கி.வீரமணி கூறியுள்ளார்.விடுதலை சிறுத்தைகள் கட்சியின் மாணவர் அமைப்பான முற்போக்கு மாணவர் கழகத்தின் சார்பில் ஈழத் தமிழர்களை காப்பாற்றக் கோரியும் இலங்கையில் போரை நிறுத்தக் கோரியும் பேரணி நடைபெற்றது. பேரணியை திராவிடர் கழக தலைவர் கி.வீரமணி தொடங்கி வைத்தார்.மன்றோ சிலை அருகே தொடங்கிய பேரணி, சேப்பாக்கம் விருந்தினர் மாளிகையில் முடிவடைந்தது. இதில் ஆயிரக்கணக்கான மாணவர்கள் பங்கேற்றனர்.எங்களை அழித்துக் கொள்வோம்-வீரமணி:பேரணியை தொடங்கி வைத்து வீரமணி பேசுகையில், நமக்கு ஒரே இலக்குதான் இலங்கையில் யுத்த நிறுத்தம் செய்ய வேண்டும். தமிழர்கள் காப்பாற்றப்பட வேண்டும். இல்லாவிட்டால் நாங்கள் எங்களையும் அழித்துக் கொள்ள தயங்க மாட்டோம்.ராஜிவ் காந்தி கொலையை வைத்து தமிழ் உணர்வுகளை அழித்து விட முடியாது. இலங்கை ராணுவத்தால் இறுதி வெற்றி பெற முடியாது என்றார்.சுண்டைக்காய் நாட்டின் தைரியம்-ராமதாஸ்:பேரணியின் முடிவில் பா.ம.க. நிறுவனர் டாக்டர் ராமதாஸ் உரையாற்றினார். அவர் கூறியதாவது:அனைத்துக் கட்சி கூட்டத்தை கூட்டி போரை நிறுத்துவோம் என்று தீர்மானம் கொண்டு வந்தோம். தொடர்ந்து தமிழக முதல்வர் எடுத்த முயற்சிகள், எடுக்கின்ற முயற்சிகளுக்கு பா.ம.க, விடுதலை சிறுத்தைகள் ஆதரவு கொடுத்து கொண்டிருக்கிறோம்.யோசனைகளையும் சொல்லி வருகிறோம். பிரதமர் போரை நிறுத்த வேண்டும் என்று சொன்ன நிலையிலே, வெளியுறவுத்துறை அமைச்சர் பிரணாப் முகர்ஜி அழுத்தம் திருத்தமாக போரை நிறுத்த வேண்டும் என்று சொன்ன நிலையிலே, ராஜபக்சே கேட்கவில்லை. அவர் இந்தியாவை மதிக்கவில்லை என்று தான் அர்த்தம்.ஒரு சுண்டைக்காய் நாடு. இந்தியா வளர்ந்து வருகிற வல்லரசு என்று மற்ற நாடுகள் நினைத்து கொண்டிருக்கிறபோது இந்த சுண்டைக்காய் நாடு எந்த தைரியத்திலே அப்படி சொல்கிறது.தமிழர்கள் எரிமலையாக கொதித்து போய் இருக்கிறார்கள். போரை நிறுத்த முடியாது என்று சொல்லிவிட்டார் ராஜபக்சே. அடுத்து என்ன செய்ய போகிறோம்.ஆறே கால் கோடி தமிழர்களுக்கு தலைமை தாங்குகின்ற முதல்வர் கலைஞரின் வேண்டுகோளையும், சிங்களவன் நிராகரித்து விட்டான்.ஏற்க மறுத்துவிட்டான் என்கிற போது மாற்று வழி என்ன என்பதை நாம் யோசிக்க வேண்டும். இதில் நானும், திருமாவளவன் மட்டும் யோசித்தால் போதாது. ஒன்று கூடி, தமிழக முதல்வர் தலைமையிலே ஒன்று கூடி அடுத்து என்ன என்பதை நாம் அவர் தலைமையிலே யோசிக்க வேண்டும்.அவரை முன்னிறுத்தி யோசிக்க வேண்டும். அவர் பின்னால் நின்று போராடுவதற்கு நம்மை தயார்படுத்த வேண்டும்.இங்குள்ள தமிழர் ஒன்றாதல் கண்டோம் என்ற நிலை உருவாக வேண்டும். தனித்து கூட்டம் போடுங்கள். ஆனால் தனித்து முடிவு எடுக்காதீர்கள். மாறுபாடாக கருத்து சொல்கிறேன் என்று எண்ணிக் கொள்ள வேண்டாம்.அந்த வகையில் அடுத்து இந்திய அரசு என்ன செய்ய வேண்டும் என்பதை அனைத்துக் கட்சிக் கூட்டத்தை கூட்ட வேண்டும் என்ற வேண்டுகோளை நான் வழிமொழிகிறேன் என்றார் ராமதாஸ்.பேரணியில் விடுதலை சிறுத்தைகள் தலைவர் திருமாவளவன், நடிகர் மன்சூர் அலிகான், இயக்குனர் வி.சி.குகநாதன், ஓவியர் வீரசந்தானம் உள்பட ஏராளமானோர் பங்கேற்றனர்.

தமிழ் பேசும் 'பாவத்திற்காக' அழிக்கிறார்கள்-கனிமொழி

புதன்கிழமை, நவம்பர் 19, 2008

சென்னை:

இலங்கையில் நடப்பது என்ன? என்று மக்களுக்கு விளக்கிக் கூறுவதற்காக தமிழ்நாடு முழுவதும் மாணவர் கூட்டமைப்பு சார்பில் வேன் பிரசாரம் செய்யப்படுகிறது. இந்த சுற்றுப்பயணத்தை கவிஞர் கனிமொழி எம்.பி. கறுப்பு கொடியசைத்து தொடங்கி வைத்தார்.விடுதலைச் சிறுத்தைகளின் மாணவர் பிரிவான தமிழக மாணவர் கூட்டமைப்பின் சார்பில், இலங்கையில் நடப்பது என்ன? என்பதை மக்களுக்கு விளக்கும் வகையில் மாணவர்கள் வேன் பிரசாரம் மேற்கொள்கின்றனர்.கூட்டமைப்பின் தலைவர் எழிலன் தலைமையில் 15 மாணவர்கள் மாநிலம் முழுவதும் சுற்றுப் பயணம் மேற்கொள்கின்றனர்.அந்த வேனின் இருபுறங்களிலும் இலங்கையில் நடக்கும் இனப் படுகொலையைச் சித்தரிக்கும் படங்கள் ஒட்டப்பட்டுள்ளன.14 நாட்கள் நடக்கும் இந்த பிரச்சார பயணத்தை திமுக எம்பி கனிமொழி கறுப்பு கொடியசைத்து துவக்கி வைத்தார். அப்போது அவர் பேசுகையில்,நம் நாடு நிலவுக்கு செயற்கைகோள் அனுப்பியதைப் பெருமையாகப் பேசுகிறோம். அதே நேரத்தில் ஈழத்தின் உண்மை நிலை என்ன என்று நம்மால் முழுவதுமாக தெரிந்து கொள்ள முடியவில்லை.பத்திரிகைகள், ஊடகங்கள் அந்த நாட்டு அரசு என்ன சொல்கிறதோ அதைத்தான் வெளியிடுகின்றன.இலங்கையில் பள்ளிக்குப் போக வேண்டிய குழந்தைகள் பதுங்கு குழியில் உயிருக்குப் போராடிக் கொண்டிருக்கிறார்கள்.போர் அறிவிப்பு செய்த பிறகு, பாதிரியார் ஒருவரை அவர் தங்கியிருக்கும் இடத்தை விட்டு செல்லுமாறு அரசு ஆணையிட்டது. அதையடுத்து அந்தப் பாதிரியாரும் மூட்டை, முடிச்சுகளை கட்டிக் கொண்டு போக புறப்பட்டார். அப்போது இரண்டு குழந்தைகள் அங்கு வந்தனர். அவர்களிடம் எனது ஞாபகமாக வைத்துக் கொள்ளுங்கள் என்று கூறி பாதிரியார் 2 பேனாக்களைக் கொடுத்தார்.அந்தப் பேனாவை பெற்றுக் கொண்ட அந்தக் குழந்தைகள் பாதிரியாரிடமே அவற்றைத் திருப்பிக் கொடுத்தன. நாங்கள் உயிருடன் இருப்போமா அல்லது இருக்க மாட்டோமா என்று தெரியவில்லை. எனவே, வேறு ஊரில் உள்ள குழந்தைகளுக்கு இந்தப் பேனாவைக் கொண்டு போய் கொடுங்கள் என்று அந்தக் குழந்தைகள் கூறியுள்ளனர்.எதிர்கால நம்பிக்கை நட்சத்திரங்களான குழந்தைகளின் உயிர்களுக்கு உத்தரவாதம் இல்லை. இப்படியொரு நிலையை ஏற்படுத்தியிருக்கும் நாடு ஒரு நாடா?.தன் மக்களையே அழிக்கும் அநாகரீகத்தை தடுக்க வேண்டும் என்று மத்திய அரசு குரல் கொடுக்க வேண்டும். தமிழ் பேசும் பாவத்திற்காக அவர்களை அழிக்கிறார்கள். தமிழர்கள் என்பதற்காக இல்லாவிட்டாலும் அவர்களும் மனிதர்கள் என்பதற்காகவாவது குரல் கொடுக்க வேண்டும் என்றார் கனிமொழி.இந்த நிகழ்ச்சியி்ல் விடுதலைச் சிறுத்தைகள் தலைவர் தொல்.திருமாவளவன், திராவிட இயக்கத் தமிழர் பேரவைத் தலைவர் சுப.வீரபாண்டியன், பெரியார் திராவிடர் கழகப் பொதுச்செயலாளர் விடுதலை ராஜேந்திரன், கவிஞர் காசி ஆனந்தன் ஆகியோரும் பங்கேற்றனர்.மதிமுக உண்ணாவிரதம்:இதற்கிடையே இலங்கியில் போரை மத்திய அரசு உடனே தடுத்து நிறுத்தக் கோரி மதிமுக சார்பில் இன்று கரூரில் உண்ணாவிரதம் நடைபெற்றது.கரூர் தாலுகா அலுவலகம் முன் நடந்த உண்ணாவிரதப் போராட்டத்துக்கு பொறுப்புக் குழுத் தலைவர் குமாரசாமி தலைமை தாங்கினார்.இதில் நூற்றுக்கும் மேற்பட்டோர் கலந்து கொண்டனர்.